(17 ноябрь, 2016 ел) Балалар һәм яшьүсмерләр өчен булган товар һәм хезмәт күрсәтүнең сыйфатын яхшыртуга юнәлдерелгән «Иң яхшысы — балаларга» конкурсының нәтиҗәләре билгеле булды. Ул Россия һәм Дәүләт думасының Җәмәгать палатасы тарафыннан оештырыла.
Программаның төп максаты һәм бурычы: балалар һәм яшьүсмерләр өчен булган товар һәм хезмәт күрсәтүнең сыйфатын яхшырту, «Иң яхшысы — балаларга» сыйфат билгесен тапшыру, Россия җитештерүчеләренә балалар һәм яшьүсмерләр өчен булган югары сыйфатлы товарны (хезмәт күрсәтүне) Россия һәм чит ил базарында алга этәрергә булышу, контрафактлы продукциягә каршы көрәш.
Татарстан халыклары Дуслыгы Йортының мәктәп укучылары өчен булдырылган «Дуслык һәм татулык дәресләре» проекты экспертлар комиссиясенең уңай билгесенә лаек булган һәм «Иң яхшысы — балаларга» сыйфат билгесе белән бүләкләүгә тәкъдим ителгән.
Конкурсның лауреатларын рәсми бүләкләү тантанасы 24 ноябрь көнне Мәскәүдә Россия Федерациясенең Җәмәгать палатасында узачак.
Бүләкләү тантанасында Россия Федерациясенең Дәүләт хакимияте, Россия Федерациясенең Җәмәгать палатасы вәкилләре һәм иҗтимагый оешмалар җитәкчеләре катнашачак.
Татарстан халыклары Дуслыгы Йорты мәгълүмат үзәге