Бүген Татарстанның Хөкүмәт Йортында республика Рәисе Рөстәм Миңнеханов һәм Лаосның Халык-Революция партиясе үзәк комитеты әгъзасы, ил министры һәм Сәясәт һәм милли администрациясе рәисе Пхувонг Ункхамсэн белән очрашты. Бу хакта республика Рәисенең матбугат хезмәте хәбәр итә.
Очрашуда Россия-Лаос мөнәсәбәтләре кысаларында озак вакытлы хезмәттәшлек перспективалары турында фикер алыштылар. Рөстәм Миңнеханов Татарстанның икътисади потенциалы турында сөйләде һәм Россия-Лаос багланышларының күп планлы, үзара файдалы һәм ышанычлы булуын әйтте. Татарстан Рәисе сүзләренчә, республика предприятиеләренең Лаоста эшләү тәҗрибәсе бар. Алар арасында КАМАЗ автомобильләрен кайтару һәм илнең Казан вертолетлар заводы белән хезмәттәшлеге.
Фото: ТР Рәисе матбугат хезмәте
Алар шулай ук гуманитар хезмәттәшлек турында да сөйләште. Рөстәм Миңнеханов төбәктәге югары уку йортларында 20 меңнән артык чит ил студенты укый диде һәм Лаостан абитуриентларны кабул итәргә әзерлеге һәм республиканың хезмәттәшлеккә гомумән ачык булуын да әйтте.
Пхувонг Ункхамсэн эш сәфәре белән Татарстанга килде, ул Казан федераль университетында һәм төбәктәге кайбер сәнәгать оешмаларында булачак. Рөстәм Миңнеханов аның Татарстанда булуы нәтиҗәле булыр дигән өмет белдерде.