(24 февраль 2015) Татарстан Республикасы Президенты Рөстәм Миңнеханов Абу-Дабида Берләшкән Гарәп Әмирлекләре тышкы эшләр министры, сәүдә, икътисади һәм техник хезмәттәшлек буенча хөкүмәтара Россия — Әмирлек комиссиясе рәистәше Шәех Абдалла бен Заед Әл-Нахайян белән очрашты.
Искәртеп узабыз: ТР Президенты РФ сәнәгать һәм сәүдә министры Денис Мантуров рәислегендәге Россия рәсми делегациясе составында Берләшкән Гарәп Әмирлекләрендә эш сәфәрендә. Шәех Абдалла бен Заед Әл-Нахайян белән очрашу барышында авиаэлемтә, сәнәгать тармагында, шулай ук икътисадның кайбер юнәлешләре буенча уртак проектларны тормышка ашыру өлкәсендә хезмәттәшлек мәсьәләләре хакында фикерләштеләр.
Шәех Абдалла бен Заед Әл-Нахайян IDEX-2015 (Абу-Даби милли күргәзмәләр үзәге) халыкара оборона күргәзмәсендә катнашучы Россия компанияләре стендлары белән дә танышты, дип хәбәр итә ТР Президенты матбугат хезмәте.