(16 ноябрь, 2015 ел) Рязань өлкәсендә Сөембикәгә — Казан ханлыгы ханбикәсенә һәйкәл ачылачак. Бу хакта Касыйм шәһәренең Мәдәният йортында “Сөенбикә — күренекле хатын-кыз һәм хакимбикә” Бөтенроссия фәнни конференциясендә хәбәр ителде.
Һәйкәл, татар милли цивилизация үзәге Касыйм шәһәренең тарихи кыйммәтен кайтару максатыннан, куела. Моңа беренче адым буларак фәнни конференция уздырылды. Анда Казан, Мәскәү, Санкт-Петербург, Уфа, Иваново, Тверь, Рязаньнан тарихчылар, туган якны өйрәнүчеләр, галимнәр һәм хакимият вәкилләре катнашты, диелә “Рязанская газета” басмасында.
Мәгълүмат өчен. Сөембикә (Сөенбикә) — улы Үтәмеш-Гәрәй балигъ булганчы Казан ханлыгы патшабикәсе (1549-1551) була. Ногай Урдасы бәге Йосыфның бердәнбер кызы башта Җангали, Сафа-Гәрәй, Шаһгали ханнар хатыны була. Сөембикә — Ислам тарихында ил белән идарә иткән беренче мөселман хатын-кызларның берсе.
Туу һәм үлү даталары билгесез, кайбер чыганаклар 1557 елда вафат булуын күрсәтә. 1551 елда ул казанлылар тарафыннан акча белән бергә Мәскәүгә озатылган.
Мәгълүмат http://tat.tatar-inform.ru сайтыннан алынды