(21 апрель, 2016 ел) ТР Мәдәният министрлыгы, Бөтендөнья татар конгрессы Башкарма комитеты, Традицион мәдәниятне үстерү үзәге 25 апрельдән 29 ына кадәр «Сабан туе бәйрәмен оештыру һәм уздыру методикасы һәм технологиясе» семинар-практикумын уздыра.
Әлеге чара татар халкының Сабан туе милли бәйрәмен Россия төбәкләрендә, чит илләрдә оештыру һәм уздыру эшенә ярдәм итү максатында оештырыла.
Анда катнашу өчен Россиянең 44 төбәгеннән һәм 7 чит илдән татар иҗтимагый оешмаларыннан 70 вәкил чакырылган, дип хәбәр итә ТР Мәдәният министрлыгы матбугат хезмәте.
Семинар-практикум Социомәдәни өлкә һәм сәнгать белгечләренең өстәмә һөнәри белем бирү институты базасында уздырыла. Әлеге эшкә ТР Фәннәр академиясе, Россия Көрәш федерациясе вәкилләре җәлеп ителә.