(11 август, 2015 ел) Муса Җәлил эзләре буйлап Санкт-Петербург – Тосно – Лисино – Корпус – Радофиниково – Санкт-Петербург маршруты буенча экскурсия дә оештырыла
25 август көнне Санкт-Петербургта һәм Ленинград өлкәсендә каһарман-шагыйрь Муса Җәлил (1906-1944) истәлегенә багышланган тантаналы чаралар уздырыла.
Татарстанның Санкт-Петербург шәһәре һәм Ленинград өлкәсендәге даими вәкиллеге Бөек Ватан сугышында Җиңүнең 70 еллыгына һәм татар халкының бөек улы, каһарман-шагыйрь, Советлар Союзы Герое Муса Җәлилнең һәлак булуының 71 еллыгына багышланган тантаналы чаралар үткәрә.
Искәртеп узыйк: нәкъ Ленинград җирендә, Волхов фронтында, өлкән политрук чолганышта калып, авыр яраланган хәлдә әсирлеккә эләгә. Муса Җәлилнең аннан соңгы гомере фашистлар тоткынлыгында аларга каршы яшерен көрәштә үтә. …1944 елның 25 августына — Җәлил һәм көрәштәшләренең башын гильотинада чапканчыга кадәр.
Быел 25 август көнне ветераннар һәм Санкт-Петербургның татар җәмәгатьчелеге өчен 2нче һөҗүм армиясе яу урыннары һәм Муса Җәлил эзләре буйлап Санкт-Петербург – Тосно – Лисино – Корпус – Радофиниково – Санкт-Петербург маршруты буенча экскурсия оештырыла.
Экскурсиядә катнашучылар Тосно шәһәрендә Җәлил һәйкәленә һәм Радофиниково бистәсендә һәлак булган сугышчылар мемориалына чәчәкләр салырга бара.
Шул ук көнне сәгать 10.00дә Муса Җәлилнең Санкт-Петербургтагы һәйкәленә чәчәкләр китерү тантанасы һәм хәтер митингы була, дип хәбәр итә Татарстанның Санкт-Петербург һәм Ленинград өлкәсендәге даими вәкиллеге матбугат хезмәте.
Фотосурәт wikimapia.org, мәгълүмат http://www.tatar-inform.ru/ сайтларыннан алынды.