(21 июль, 2016 ел) Санкт-Петербургта татарлар тормышы белән бәйле берничә оешма эшләп килә. Милли тормышның җанлылыгы һәм 5 сентябрьдә булачак зур милли-мәдәни чара турында Татарстан Республикасының Санкт-Петербургта һәм Ленинград өлкәсендәге даими вәкиле Ренат Вәлиуллин сөйләде.
Аның сүзләренә караганда, 2010 нчы елда халык исәбен алу нәтиҗәләре буенча, бүгенге көндә Санкт-Петербургта 32 мең татар, Ленинград өлкәсендә 8 мең татар яшәве билгеле.
“Хәзерге вакытта татарлар тормышы белән бәйле берничә оешма эшләп килә: татарларның милли-мәдәни автономиясе, татарлар җәмгыяте, “Нур Плюс” оешмасы… Узган елның декабрь аенда меценат Габделбәр Алимов үз акчасына “Луч-Нур” милли-мәдәни үзәге өчен 1 мең кв.м мәйданлы бина төзеп бирде. Хәзерге вакытта анда намаз бүлмәсе бар, татар теле курслары, татар хореографиясе буенча курслар эшли. Шәһәдәге милли тормышка алар да актив рәвештә кереп киттеләр”, — дип сөйләде Ренат Вәлиуллин.
Ренат Вәлиуллин 5 нче сентябрьдә Татарстан мәдәнияте көннәре форматында, “Сөембикә” журналы белән берлектә, Татарстан Республикасы көне хөрмәтенә зур милли-мәдәни чара үткәрергә җыенулары хакында хәбәр итте.
“Татарстаннан рәссамнарны чакырабыз. Горький мәдәният йортында Татарстан күргәзмә оештырачакбыз. Артистлар катнашында концерт куячакбыз. Хәзерге вакытта сценарий төзелә”, — диде ул.