Татарстан Республикасы территориясендә Шиһабетдин Мәрҗанигә багышланган «Укытучы» фильмын төшерү — июльгә, Бохара һәм Сәмәркандта исә 2025 елның октябренә билгеләнгән. Дин белгеченең балачак еллары, үсмерлек чоры һәм галим буларак формалашуы фильмның нигезенә ятачак.
Кичә Татарстан мөфтие Камил Сәмигуллин һәм аның урынбасары Ришат Хәмидуллинга нәфис фильмның идеясен тәкъдим иттеләр. Мөфти проект авторлары белән Шиһабетдин Мәрҗанинең тормыш эшчәнлеге һәм хезмәтләре турында белешмәләр белән уртаклашты.
«Татаркино» директоры Миләүшә Айтуганова билгеләп үткәнчә, алардан тыш, тулы метражлы тарихи фильмны төшерүдә «Мосфильм» киноконцерны» федераль дәүләт унитар предприятиесенең «Фильм Фьюжн Про» кинокомпаниясе, РФ Мәдәният министрлыгы һәм Үзбәкстан Республикасы Мәдәният министрлыгы каршындагы Кинематография агентлыгы катнаша.
«Укытучы» фильмы Татарстан һәм Үзбәкстан киноучреждениеләренең хезмәттәшлеге кысаларында төшерелә. Элегрәк картинаның сценариен Салават Юзеев язачак дип хәбәр ителгән иде.