(23 мая 2019) Татарстан Республикасы Спасс муниципаль районының Болгар шәһәрендә район белән Татарстан халыклары Ассамблеясе һәм Халыклар дуслыгы йорты җитәкчелеге катнашында киңәшмә узды. Нәтиҗәдә биредә Халыклар дуслыгы йорты ачу карарын кылдылар.
Киңәшмәдә Татарстан халыклары Ассамблеясе Советы башкарма комитеты җитәкчесе Николай Владимиров, Татарстанның Халыклар дуслыгы йорты директоры, ТР Дәүләт Советы депутаты Ирек Шәрипов, ТР Спасс муниципаль районы башлыгы Камил Нугаев, район башлыгы урынбасары Сергей Тюнев, район мәдәният бүлеге җитәкчесе Фәрхәт Низамов һәм район җәмәгатьчелеге вәкилләре катнашты.
Чара барышында район җитәкчелеге Халыклар дуслыгы йорты эшен район Мәдәният йорты составында оештыру планын тәкъдим итте. Шулай ук киңәшмәдә катнашучылар районда эшләп килүче Татарстан халыклары Ассамблеясе вәкиллеге урнашачак офисны, киңәшмәләр залын, җирле милли-мәдәни автономияләрнең эш кабинетларын, концертлар һәм хореография залын карадылар.
«Район җитәкчелеге планына күргәч, моның эш өчен әйбәт формат булачагына ышанычыбыз артты», — дип әйтте Ирек Шәрипов.
Бүгенге көндә Спасс районында 4 милли-мәдәни автономия эшләп килә – рус, татар, чуаш һәм әрмән.
Халыклар дуслыгы йортының мәгълүмат үзәге