(10 март 2015) Анда “РФ төбәкләрендә милли мәгариф”, “РФ төбәкләрендә ТР Мәдәният министрлыгы грантларын тормышка ашыру” темаларына министрлар белән очрашу каралган.
14 мартта “Татар федераль милли-мәдәни мохтарияте” иҗтимагый оешмасының VIII хисап-сайлау конференциясе уздырыла. Конференция сәгать 11дә ТР Яшьләр эшләре һәм спорт министрлыгының актлар залында (Казан шәһәре, Петербург урамы, 12 нче йорт, 3 нче кат) үтәчәк.
Әлеге чарада РФ Президенты администрациясе, РФ Мәдәният министрлыгы, ТР хакимияте вәкилләре катнаша. Шулай ук Россия төбәкләреннән татар милли-мәдәни мохтариятләре җитәкчеләре һәм активы, иҗтимагый оешмалар, ММЧ вәкилләре дә чакырылган, дип хәбәр итә мохтарияттән Илмира Камаева.
Аерым алганда, конференциянең көн тәртибендә түбәндәге сораулар каралачак:
Татар федераль милли-мәдәни мохтариятенең 2011-2014 еллар өчен хисабы;
контроль-ревизия комиссиясе хисабы;
“Татар федераль милли-мәдәни мохтарияте” иҗтимагый оешмасы Советын сайлау;
контроль-ревизия комисиясенә сайлаулар һәм башка сораулар.
Конференция кысаларында «Россия Федерациясе төбәкләрендә милли мәгариф» темасына ТР Премьер-министры урынбасары – ТР мәгариф һәм фән министры Энгель Фәттахов белән, «Россия Федерациясе төбәкләрендә Татарстан Республикасы Мәдәният министрлыгы грантларын тормышка ашыру» темасына ТР мәдәният министры Айрат Сибагатуллин белән эшлекле очрашулар оештырылачак.
Искәртеп үтәбез: “Татар федераль милли-мәдәни мохтарияте” иҗтимагый оешмасы 1998 елдан бирле гамәлдә һәм ул хәзер 30 төбәкнең татар милли-мәдәни мохтариятен берләштерә; идарә органы — Совет, ә Совет рәисе — Илдар Ирек улы Гыйльметдинов.
Чыганак: «Татар информ» ИА