(12 февраль) 15 февраль көнне Г.Камал исемендәге Татар дәүләт академия театрында Илһам Шакировның юбилей кичәсе була. Шул уңайдан булачак концерт программасында танылган артистлар катнашуы көтелә.
Халык артисты, татар эстрадасының тере легендасы Илһам Шакиров 80 яшьлек юбилей көнен яраткан тамашачылары һәм хезмәттәшләре белән үткәрә. Юбилей кичәсе программасында Зилә Сөнгатуллина, Хәмдүнә Тимергалиева, Римма Ибраһимова, Георгий Ибушев, Идрис Газиев, Резидә Галимова, Филүс Каһиров, “Казан егетләре” төркеме һ.б. катнашуы көтелә.
Юбилей кичәсенең режиссеры – Татарстанның халык, Россиянең атказанган артисты Илдар Хәйруллин. Алып баручы –Татарстанның атказанган артисты Фәнис Җиһаншин.Сценарий авторы – драматург, режиссер Илгиз Зәйниев, дип хәбәр итә ТР Мәдәният министрының матбугат хезмәте.
Алдагы көнне юбилярга, ТР Президенты указы белән, фидакарь хезмәте өчен дәүләт бүләге тапшыру планлаштырыла.
Искәртеп үтәбез: Илһам Гыйльметдин улы Шакиров 1935 елның 15 февралендә Татарстанның Сарман районы Яңа Бүләк авылында дөньяга килгән. 1960 елда җыр сәнгате буенча Казан дәүләт консерваториясен тәмамлый. Россиянең һәм Татарстанның халык артисты, Татарстан Республикасының Г.Тукай исемендәге Дәүләт бүләге иясе. 1986 елны “Халыклар дуслыгы” орденына лаек була.