(13 сентябрь, 2016 ел) Яңа уку елы башлангач, КФУның Лев Толстой исемен йөрткән Филология һәм мәдәни багланышлар институты, гадәттәгечә, Казан халкын татар телен өйрәнергә чакыра. Өч айга исәпләнгән укулар – бушлай.
КФУда чираттагы татар теле курслары 26 сентябрьдән 16 декабрьгә кадәр дәвам итәчәк. Университет галимнәре укыткан курсларга язылу өчен уку йортының рәсми сайтында – kpfu.ru/tatkurs.html тәкъдим ителгән электрон анкетаны 11 сентябрьгә кадәр тутырып җибәрергә, ә беренчел исемлекләр билгеле булгач, 16 сентябрьгә хәтле язмача гаризаны университетка китерергә кирәк.
Дәресләр атнага ике тапкыр, нигездә – дүшәмбе һәм чәршәмбе, сишәмбе һәм пәнҗешәмбе көннәрендә иртәнге 8.00-10.00 һәм кичке 18.00-20.00 сәгатьләрдә үткәреләчәк. Тел өйрәнүчеләр татарча белү дәрәҗәсенә карап, дүрт төркемгә бүленәчәк. Укыту программасы да башлангыч төркемнәргә һәм телне өйрәнүне дәвам итүчеләргә аерым төзелгән. Укуны тәмамлагач һәркемгә татар телен белү дәрәҗәсе күрсәтелгән сертификат тапшырылачак.
Мондый курслар КФУда еш кына яз көне дә оештырыла. Узган ел көзге курсларда 700дән күбрәк кеше татар телен өйрәнде. Быелгы курсларда укырга теләүчеләр дә күп. Бүгенге көндә инде 600гә якын кеше теркәлгән.
КФУда татар теле курслары халыктан, дәүләт оешмаларыннан алынган күпсанлы мөрәҗәгатьләр буенча, шулай ук Татарстан Хөкүмәте карары белән “Татарстанда дәүләт телләрен, һәм башка телләрне саклау, өйрәнү һәм үстерү” дәүләт программасын тормышка ашыру кысаларында соңгы биш елда уңышлы үткәрелеп килә. Анда төрле милләт вәкилләре, төрле яшьтәге, төрле һөнәр ияләре укый. Руслар гына түгел, ана телен белмәгән татарлар да тел өйрәнә.