Казанда Бөтенроссия туган тел форумында катнашу өчен ТР мәгариф оешмаларының һәм РФ субъектларының татар теле һәм әдәбияты укытучылары җыелачак.
ТР Мәгариф һәм фән министрлыгы хәбәр иткәнчә, 12-14 нче ноябрьдә узачак форумда мәгариф бүлекләре (идарәләре) башлыклары урынбасарлары, милли мәгариф һәм Россия субъектлары белән хезмәттәшлек өчен җаваплы методистлар катнашачак. Анда татар телендә белем бирүче гомуми белем бирү оешмалары директорлары, милли-мәдәни автономияләр, Татарстан Республикасының Россия субъектларындагы вәкиллекләре, 800 кешене колачлый торган Бөтендөнья татар конгрессы бүлекчәләре вәкилләре катнашачак.
ТР Мәгариф һәм фән министрлыгы Бөтендөнья татар конгрессы Башкарма комитеты белән берлектә катнашучылар өчен күргәзмәләр, Казан буенча экскурсияләр, Арча районы һәм Казан мәгариф оешмаларына сәфәр оештыра. Форум кысаларында тәҗрибә уртаклашу өчен мастер-класслар, педагогик остаханәләр һәм секцион утырышлар уздыру планлаштырыла.