(17 гыйнвар, 2017 ел) Казанда ТР Дәүләт Советы рәисе, Татарстан халыклары Ассамблеясе рәисе Фәрит Мөхәммәтшин җитәкчелегендә III Татарстан Республикасы халыклары корылтаен уздыру һәм аңа әзерләнү буенча оештыру комитеты утырышы үтте.
Утырыш башында оештыру комитетын җитәкләүче Фәрит Мөхәммәтшин әлеге чарага өч ай калып барганы хакында әйтеп үтте. Шуңа күрә оештыру комитетына кергән министрлык һәм ведомстволар җитәкчеләрен корылтайга әзерлек эшләренә җаваплы карарга киңәш итте.
Парламент җитәкчесе әйтүенчә, 1992 һәм 2007 елларда узган Татарстан халыклары корылтае республикадагы милләтара һәм динара мөнәсәбәтләр үсешенә зур тәэсир ясады.
Дәүләт Советы рәисе Татарстан халыклары корылтаен даими рәвештә уздыру тәкъдиме белән чыкты. Аның фикеренчә, әлеге чараны 10 елга бер тапкыр уздыру кулай, дип хәбәр итә Дәүләт Советы матбугат хезмәте.
Оештыру комитеты утырышында Татарстан Республикасы Президенты Аппараты җитәкчесе урынбасары — Татарстан Республикасы Президентының эчке сәясәт мәсьәләләре буенча Департаменты җитәкчесе Александр Терентьев чыгыш ясады. Ул Татарстан халыклары корылтаен уздыру хакында, аңа әзерлек чаралары планы буенча сөйләде һәм делегатлар сайлау тәртибен аңлатты.
Татарстан халыклары Дуслыгы Йорты мәгълүмат үзәге