(19 март 2021) ТР Дәүләт Советы рәисе, Татарстан халыклары Ассамблеясе Советы рәисе Фәрит Мөхәммәтшин төрле тармаклар хезмәткәрләренә РФ һәм ТР Дәүләт бүләкләрен тапшырды. Бүләкләнүчеләр арасында ТР казах җәмгыяте рәисе Сәгыйть Җаксыбаев һәм Күпмилләтле якшәмбе мәктәбе педагогы Фәнилә Хәбирова да бар иде.
Фәрит Мөхәммәтшин үз чыгышында Татарстан халыклары Ассамблеясенең республика тормышына зур өлеш кертүен билгеләп үтте:
«Күпмилләтле республикабызда төрле милләт һәм дин вәкилләренең үзара аңлашуын һәм ярдәмләшүен саклап калу мөһим. Бу эшне дәүләт хакимияте органнары, шул исәптән составына бик күп милли-мәдәни берләшмәләр кергән Татарстан халыклары Ассамблеясе алып бара. Күп кенә мәсьәләләрне бергәләп, фикерләшеп хәл итәбез. Чөнки үзара килешү һәм мөнәсәбәтләребез кыйммәтләрен саклаудан башка бернинди дә булдыра алмавыбызны аңлыйбыз».
ТР казахларының милли-мәдәни автономиясе рәисе, Татарстанда күпмилләтле иҗтимагый хәрәкәтне башлаучыларның берсе Сәгыйть Җаксыбаев «ТАССР төзелүгә 100 ел» медаленә лаек булды.
Фәнилә Хәбирова — өстәмә белем бирү педагогы, Күпмилләтле якшәмбе мәктәбенең вокал буенча укытучысы, «Жемчужинки» күпмилләтле вокаль ансамбленә нигез салучы һәм аның җитәкчесе — «Татарстан Республикасының атказанган мәдәният хезмәткәре» исеменә лаек булды.
Хезмәттәшләребезне лаеклы бүләкләре белән котлыйбыз!
Дуслык йортының мәгълүмат үзәге