(23 май, 2016 ел) 26 нчы май көнне Казанда, татар халкының милли бәйрәме Сабантуй алдыннан, “Сабан туе-2016” ярышларында катнашучылар һәм җиңүчеләр өчен тәүге тапкыр “Бирнә җыю” тантанасы оештырылачак.
Чара Казан башкарма комитеты ярдәме белән үткәрелә. Сабантуй алдыннан бирнә җыю гадәте борынгыдан килә. Быел исә шушындый форматта торгызыла.
Тантанада катнашучылар Казан шәһәре урамнары буйлап милличә бизәлгән ат арбаларында йөриячәк. Хәрәкәт маршруты билгеләнгән: Иске татар бистәсеннән башланып, Мәрҗани, Татарстан, М. Сәлимҗанов, Павлюхин, Оренбург тракты урамнары буенча “Казан ярминкәсе”нә кадәр.
“Татар утары” мәйданында (Мәрҗани урамы, 8 нче йорт) милли кәсепчелек эшләнмәләре ярминкәсе, милли ризыклар дегустациясе һәм концерт программасы оештырылачак.
Татарстан халыклары Дуслык Йорты мәгълүмат үзәге