(15 март, 2016 ел) 18 март көнне Чувашиядә аз санлы милләтләргә дәүләт тарафыннан булышлык күрсәтү сораулары буенча VI мәдәни форум узачак. Биредә Татарстан халыклары Ассамблеясы һәм Дуслык Йорты вәкилләре дә катнашачак.
Форумның оештыручысы булып Россиянең мәдәният министрлыгы тора. Чебоксарга Идел буе федераль округының барлык төбәкләреннән делегацияләр киләчәк. Чараның программасында фәнни-гамәли конференция, түгәрәк өстәл, мастер-класс, декоратив-гамәли сәнгать һәм рәсем сәнгате осталары эшләре күргәзмәсе, шулай ук милли үзәкләрнең халык иҗаты фестивале керә.
Форумның төп бурычы – Россиянең аз санлы халыкларының традицион мәдәниятына булышлык күрсәтү буенча дәүләт сәясәтенең төп юнәлешләрен билгеләү максатында мәдәниятләр диалогын төзү, шулай ук аз санлы милләтләрнең мәдәниятын саклау һәм популярлаштыру, этникара даирәдә иҗади бәйләнешләр тудыру һәм аларны ныгыту, проектлар буенча төгәл эшчәнлек стимуллаштыру һәм Россия халыкларының һәм төбәкләренең этномәдәни үсеше өлкәсендә конкрет инициативаларны чынга ашыру.
Форум кысаларында РФ субъектлары башкарма хакимиятләренең милләтара мәдәни проектларны чынга ашыру өлкәсендәге эш тәҗрибәләре каралачак.
Татарстан халыклары Дуслык Йорты мәгълүмат үзәге