(4 май, 2016 ел) 9 май көнне “Үлемсез полк” акциясендә 82 меңләп Татарстан халкы катнашырга ниятли. Татарстан халыклары Ассамблеясы һәм Дуслык Йорты вәкилләре кәрванның беренче рәтләрендә барачак.
9 май билгесез солдатларның каберләренә һәм Бөек Ватан сугышында хәлак булганнарга куелган һәйкәлләргә чәчәкләр салудан башланачак. Төп чаралар Ирек мәйданында узачак. 10:00 сәгатьтә казан гарнизоны хәрбиләренең тантаналы йөреше башланачак.
Оештыручылар сүзләренә караганда, “Үлемсез полк” акциясенең кәрванын 14:00 сәгатьтә “Казан” милли-мәдәни үзәге мәйданында төзи башлаячаклар. 15:00 сәгатьтә ул кузгалачак һәм “Казан” милли-мәдәни үзәге – Пушкин урамы – Ирек мәйданы – Лобачевский урамы – Кремль урамы – Чернышевский урамы – 1 май мәйданы маршруты буенча атлаячак.
Кичке чаралар Җиңү паркында һәм “Казан Арена” стадионы территориясендә узачак. Стадион каршындагы программа 18:00дән 22:00 сәгатькә кадәр барачак һәм бәйрәм фейерверкы белән төгәлләнәчәк.
Мәгълүмат Татар-информ һәм Бизнес онлайн сайтларыннан алынды.