(29 гыйнвар) Җыелышта 3 мәсьәлә каралды: иҗтимагый оешма Советы хисабы, ревизия комиссиясе хисабы һәм актив әгъзаларга бүләкләр тапшыру.
Оешма һәр елның гыйнвар аенда, гадәт буенча, узган елгы эшчәнлегенә йомгак ясый, киләчәккә бурычлар билгели. Җыелышта Татарстан халыклары Ассамблеясы һәм Дуслык Йорты җитәкчеләре, Казан шәһәре башкарма комитетының иҗтимагый оешмалар белән элемтә бүлеге белгече Алсу Галимова, дин әһелләре, оешманың 100 дән артык активисты катнашты.
Рус милли-мәдәни оешмасы вәкилләрен Татарстан халыклары Ассамблеясы рәисе урынбасары Сагит Джаксыбаев сәламләде. Татарстан халыклары Дуслык Йорты директоры Ирек Шәрипов Ассамблея һәм Дуслык Йортының яңа порталын тәкъдим итте.
“Үз эченә Татарстан халыклары Ассамблеясында рәсми теркәлгән 40 ка якын милли-мәдәни автономияләр сайтларын берләштергән интернет-порталның бүгенге көндә Россиядә мондый аналогы юк”,- диде Ирек Шәрипов. “Портал татар, рус, инглиз телләрендә алып барыла. Милли-мәдәни автономияләр үз сайтларын туган телләрендә дә алып бару өчен техник мөмкинлекләр тудырылган. Интернет-порталның “Яңалыклар” бүлеге оператив мәгълүмат, милли сәясәт, мәдәният, мәгърифәткә багышланган соңгы яңалыклар белән тулыландырыла”. Дуслык Йорты директоры Ассамблеяның иң актив автономияләренең берсе рус милли-мәдәни оешмасы җитәкчелеген рус сайтын, Порталны яңалыклар, төрле кызыклы мәгълүмат белән активрак тулылындырырга чакырды.
Гомүми җыелыш Татарстан халыкларының Дуслык Йортында узды.