(30 март 2016) Татарстан халыклары Яшьләр Ассамблеясы вәкилләре “Г.Тукай турында 130 факт” (“130 фактов о Г.Тукае”) дип исемләнгән марафонга старт бирде. Әлеге марафон күренекле татар шагыйре Габдулла Тукай тууга 130 ел тулу уңаеннан оештырыла. Чарада теләгән һәркем катнаша ала.
Марафонның төп геройлары – төре милләттән булган Татарстан халыклары Яшьләр Ассамблеясы вәкилләре. Алар Г.Тукайның тормышыннан булган вакыйгалар турында сөйләп, видеотасмалар әзерләячәк. Марафон барышында Инстаграм челтәренә шундый 130 видеотасма эленәчәк.
Әлеге чарада күренекле һәм танылган шәхесләр дә катнашачак. Алар бу проектка Республика халкының игътибарын җәлеп итәргә булышачак, дип сөйли марафонны оештыручылар. Мисалга, ТР Яшьләр эшләре һәм спорт министры Владимир Леонов үз ризалыгын биргән инде.
Марафонда теләгән һәркем катнаша ала. Моның өчен Г.Тукайның тормышыннан булган берәр вакыйга турында сөйләп, 15 секундлык видеотасма төшерергә һәм аны #Тукай130 хештегы белән Инстаграм челтәренә элергә кирәк.
Исегезгә төшерәбез, Татарстан халыклары Яшьләр Ассамблеясы вәкилләренең мондый зур проектны беренче генә үткәрүләре түгел. Күптән түгел алар “М.Җәлил шигырьләрен уку” (“Чтение стихов М.Джалиля”) марафонын оештырганнар иде. Әлеге чарада төрле милләт вәкилләре шагыйрьнең шигырьләрен сөйләп, видеотасмаларын шул ук Инстаграм челтәренә урнаштырдылар.
Татарстан халыклары Дуслык Йорты мәгълүмат үзәге