(13 март 2015) ТР мөселманнары Диния нәзарәтеннән шундый хәбәр алынды.
Татарстан мәчетләрендә бу атна җомга намазында, ягъни бүген Изге Коръән укыла һәм Казанның “Адмирал” сәүдә йортында 11 март көнне чыккан янгында һәлакәткә юлыгып, бакыйга фаҗигале киткәннәр рухларына һәм каза күргәннәргә багышлап дога кылына. ТР мөселманнары Диния нәзарәте рәисе, ТР мөфтие Камил хәзрәт Сәмигуллин республика имамнарына шул хакта мөрәҗәгать белән чыкты. Янгын нәтиҗәсендә һәлак булучыларга багышланган төп чара бүген Казан кремлендәге Кол Шәриф җәмигъ мәчетендә сәгать 12.40 та була.
Искәртеп үтәбез: бүген сәгать 5кә алынган мәгълүмат буенча, Казанның “Адмирал” сәүдә йортындагы янгында һәм бинаның җимереклекләрендә 10 кешенең һәлак булуы билгеле.
Чыганак: «Татар информ» ИА