(26 апрель, 2017 ел) 2017 елның 26 апрелендә бөек татар шагыйре Габдулла Тукай тууына 131 ел тулды. Шул уңайдан Татарстан Республикасы президенты Рөстәм Миңнеханов Г. Тукай исемендәге скверда урнашкан шагыйрь һәйкәленә чәчәкләр салды.
Татар классигы истәлеген Татарстан Республикасының Дәүләт Киңәшчесе Минтимер Шәймиев, Татарстан Республикасының Дәүләт Советы рәисе Фәрит Мөхәммәтшин, Татарстан Республикасы Президенты Аппараты җитәкчесе Әсгать Сәфәров, Казан Мэры Илсур Метшин, Татарстан Республикасы хакимияте әгъзалары, ТР министрлыклары һәм ведомстволары җитәкчеләре, республика парламенты депутатлары, Татарстанның мәдәният һәм сәнгать хезмәткәрләре дә хөрмәтләде, дип хәбәр итә республика башлыгының мәтбугат хезмәте.
Бу вакыйга уңаеннан Муса Җәлил исемендәге Татар академия дәүләт опера һәм балет театрында Габдулла Тукай исемендәге Татарстан дәүләт премиясе лауреатларын бүләкләү тантанасы узачак.
Татарстанның Халыклар Дуслыгы йортының матбугат үзәге