30 август көнне «Казан» гаилә үзәге янында «Мәдәният бизәкләре» фестивале ачылу тантанасы узачак. Шушы ук мәйданчыкта Россия халыклары милли әдәбияты фестивале дә үтәчәк. Чаралар 10:00 сәгатьтә башланачак.
Кунаклар милли-мәдәни берләшмәләр вәкилләренең мәдәнияте һәм гореф-гадәтләре, Татарстан халыклары Ассамблеясе һәм Халыклар дуслыгы йорты белән таныша алачак.
Шулай ук биредә халык-сәнгать кәсебе эшләнмәләре, фотокүргәзмәләр тәкъдим ителәчәк.
Татарстан халыклары Яшьләр Ассамблеясе аерым мәйданчыкта үз тамашасын күрсәтәчәк. Биредә Татарстан халыклары уеннарында (көянтә киеп йөгерү, капчык киеп йөгерү, удмуртча балык тоту һ.б.) катнашырга мөмкин булачак.
Концерт программасында Идел буе халыклары вәкилләре булган яшь башкаручылар һәм иҗат коллективлары чыгыш ясаячак.
Килгән кунаклар милли уен коралларында уйнау һәм Кавказ, Идел буе халыклары биюләрен башкару буенча мастер-классларда катнаша алачак.
Халыклар дуслыгы йортының мәгълүмат үзәге