(18 март 2021) Мәскәүдә «Этномәдәни секторның тотрыклы үсеше» II Бөтенроссия конференциясе уза. Конференция эшендә Татарстан халыклары Ассамблеясе һәм Дуслык йорты вәкилләре катнаша.
Конференция — «ЭтНик:ПроДвижение» Бөтенроссия программасының, милли мөнәсәбәтләр өлкәсендә иң яхшы практикаларның III Бөтенроссия конкурсы һәм «Ресурс мохите» проектының йомгаклау чарасы. Чараны оештыручылар — Милләтара мөнәсәбәтләр буенча Россия Федерациясе Президенты каршындагы Совет ярдәме белән Россия халыклары Ассамблеясе, РФ Иҗтимагый палатасы һәм Гражданлык җәмгыятен үстерүгә бирелгән РФ Президенты грантыннан файдаланып милли мөнәсәбәтләр өлкәсендәге ресурс үзәге.
Татарстаннан делегация составында — ТР халыклары Ассамблеясе Советы Рәисе урынбасары, Совет башкарма комитеты җитәкчесе Константин Яковлев, ТР башкортларының милли-мәдәни автономиясе рәисе Гали Хәсәнов, ТР халыклары Ассамблеясенең Лениногорск районындагы вәкиллеге җитәкчесе Наилә Чубатова һәм Татарстанның Халыклар дуслыгы йортының этномәдәни эшчәнлек бүлеге мөдире Любовь Тукаева, шулай ук «Байга» проекты җитәкчесе Фәрит Нәбиуллин.
«Этномәдәни секторның тотрыклы үсеше» II Бөтенроссия конференциясе программасында тәҗрибә һәм иң яхшы практикалар белән уртаклашу, этномәдәни секторның яңа инициативалары һәм тенденцияләре, шулай ук уңышлы проектларны булдыру һәм алга этәрү өчен ресурс мөмкинлекләре турында фикер алышу планлаштырылган.
Дуслык йортының мәгълүмат үзәге