Татарстан халыкларының Дуслык Йортында Казан шәһәре ветераннар Советының күчмә утырышы булды. Әлеге тантанада Казан шәһәрендә яшәүче 21 ветеранга “Белоруссия Республикасын фашист илбасарларыннан азат итүнең 70 еллыгы“ дигән медаль тапшырылды. Исегезгә төшерәбез, агымдагы елның 3 июлендә Белоруссия Республикасы үзенең бәйсезлек көнен һәм фашист илбасарларыннан азат итүгә 70 ел тулуны дөньякүләм дәрәҗәдә билгеләп үтте.
Белоруссияне азат итүдә меңләгән совет сугышчылары катнаша, күпләр шунда башларын сала. Бу вакыттан бирле инде 7 дистә ел үтсә дә, әлеге ил хөкүмәте һәм халык тыныч тормыш бүләк итүчеләрне онытмый. Бәйсезлек яулаган кешеләр алдында алар үзләрен бурычлы итеп тоя. Шул уңайдан Белоруссия Президенты Александр Лукашенко “Белоруссия Республикасын фашист илбасарларыннан азат итүнең 70 еллыгы“ дигән медаль булдыру турында Указ чыгара һәм 3 июль Республикада иң зур бәйрәмнәрнең берсе – Бәйсезлек көне дип игълан ителә.
Әлеге фронтта аяусыз көрәшкән ветеран якташларыбыз арасында Советлар Союзы Герое Борис Кузнецов та бар. Әлеге тантанада Белоруссия бүләге беренчеләрдән булып аңа тапшырылды. Юбилей медальләрен һәм солдат хаты формасында эшләнгән, Белоруссия Президенты Александр Лукашенко имзасы куелган котлау хатын тапшыру тантанасында Белоруссиянең Россиядәге илчелек вәкилләре, Татарстан Республикасы хәрби комиссары Сергей Погодин, Татарстан халыклары Ассамблеясы җитәкчеләре, ветеран оешмалары рәисләре катнашты.