(10 март, 2017 ел) Идел буе һәм Урал халыкларының Бөтенроссия театр фестивалендә Казахстан, Калмык, Коми, Удмуртия, Мари Эл, Башкортостан һәм Татарстан Республикалары, Ульяновск өлкәсенең әйдәп баручы театрлары катнашачак. Иҗади көрәш 12 мартта башлана һәм ике атна дәвамында барачак.
Бу вакыт аралыгында Буа шәһәре халкы һәм кунаклары 1 балалар, 4 курчак һәм 13 драма спектакле тамашачысы була алачак, дип хәбәр итә ТР Мәдәният министрлыгының матбугат хезмәте.
Форумда катнашучыларны быел үзенең 100 еллыгын билгеләүче Буа дәүләт татар драма театры кабул итәчәк. Юбилей уңаеннан Буа шәһәрендә төрле чаралар оештырыла. Шуларның берсе – «Идел — Урал — Буа — диалог киңлекләре» («Идель — Урал — Буа — Пространство диалога») фестивале. Әлеге чара кысаларында иҗади кичәләр, илнең әйдәп баручы театр критиклары катнашында спектакльләр турында фикер алышу планлаштырыла.
Татарстан халыклары дуслыгы Йорты мәгълүмат үзәге