Туган телләр һәм халыклар бердәмлеге елы кысаларында Татарстанда «Шигъриятнең сихри юллары» Бөтенроссия фестивале узачак. Чара туган телләрендә иҗат итүче илебезнең төрле төбәк шагыйрьләрен берләштерәчәк.
Фестивальне Татарстан Республикасы Мәдәният министрлыгы ярдәмендә Татарстан халыклары Ассамблеясы һәм Дуслык йорты оештыра. Фестивальнең партнеры — Татарстан Республикасы Язучылар берлеге.
Фестиваль кысаларында катнашучылар Казанда танылган язучылар һәм шагыйрьләр белән бәйле иң мөһим урыннарда булачак, ТР Дәүләт Советы рәисе, Татарстан халыклары Ассамблеясы Советы рәисе Фәрит Мөхәммәтшин һәм ТР Язучылар берлеге әгъзалары белән очрашулар уздырачак.
16 декабрьдә Татарстанның Халыклар Дуслыгы йортында «Шигъриятнең сихри юллары» Бөтенроссия фестивален ачу һәм укучылар белән очрашу үтәчәк.
Ачылу тантанасы барышында шулай ук мәктәп укучылары арасында «Туган тел» Республика әдәби конкурсында җиңүчеләр бүләкләнәчәк. Исегезгә төшерәбез, «Яшь шагыйрь» һәм «Яшь прозаик» конкурсларының ике номинациясенә Идел буе халыкларының җиде телендә 150дән артык иҗади эш кабул ителде. Татарстан Республикасы районнарыннан 27 конкурсант җиңүче булды. Конкурс нәтиҗәләре буенча катнашучыларның иң яхшы эшләре кергән җыентык басылды.
17 декабрьдә фестиваль кунаклары Казанда рус язучысы Сергей Аксаков бюстын ачу тантанасында һәм Татарстанның Халыклар Дуслыгы йортында узачак Туган телләр һәм халыклар бердәмлеге елын ябу тантанасында катнашачак.
Дуслык йортының мәгълүмат үзәге