(11 июля 2016) “Ак калфак” бөтендөнья татар хатын-кызлары иҗтимагый оешмасы Татарстан күләмендә Милли киемнәр көнен игълан итү тәкъдиме белән чыкмакчы була. Бу хакта оешманың рәисе Кадрия Идрисова хәбәр итте.
“Ак калфак” оешмасы бу көнне 1 нче июньдә гамәлгә кертү инициативасы белән чыга.
“Ни өчен 1 нче июньме? Чөнки Халыкара балаларны яклау көнендә һәр ата-ана баласы белән каядыр бара – киемнең бер өлешен булса да һәркем үз милләтенә туры китереп кисә, үзенә күрә күркәм булачак”, — дип белдерде Кадрия Идрисова.
Ул бу мәсьәләдә сентябрь аенда җентекле сөйләшү ниятләнүен әйтте.
Кадрия Идрисова билгеләп узганча, милли киемнәр көнен гамәлгә кертү фикере апрель аенда узган форум кысаларында Калфак туенда да җиткерелгән.
“Актанышка баргач та, шушы мәсьәләне күтәрәчәкбез. Милли киемгә кайтабыз икән, милли тел дә, милли моң да кайта дигән сүз. Киемдә үзгәреш булмаганны, телдә үзгәреш ничек булсын ди… Милләт, телләрне саклап калу өчен, һәр милләтнең кием көне булырга тиеш дип уйлыйм”, — диде “Ак калфак” оешмасы рәисе.