(21 май 2018) Яр Чаллы шәһәренең «Чишмә» Халыклар Дуслыгы йортында «Милли курчак — 2018» VI шәһәр балалар иҗаты конкурсы финалы узды. Бәйгедә төрле милләттән булган 16 кызчык катнашты.
Балалар үз телләрен, халык мәдәниятен һәм милли костюм үзенчәлекләрен белүләрен күрсәттеләр.
Мордва, таджик, әрмән, үзбәк, удмурт, мари, башкорт, якут, рус, төрек, еврей, татар, әзербайҗан, лезгин, чуаш, немец – шушы милләттән булган кызлар тамашачыларны үз халкының мәдәнияте, гореф-гадәтләре белән таныштырды.
Конкурс нәтиҗәләре буенча, барлык катнашучылар да махсус исемгә лаек булдылар. Финалга кадәр «Тамашачылар мәхәббәте» исеме өчен тавыш бирү оештырылган иде. Нәтиҗәдә бу титулга лезгин халкы вәкиле булган Шейла Османова лаек булды.
Исегезгә төшерәбез, апрель ахырында әлеге проект «Безнең Татарстан» VIII республикакүләм яшьләр форумының «Тынычлык һәм татулык территориясе» мәйданчыгында беренче урынга лаек булды.
Халыклар Дуслыгы йортының мәгълүмат үзәге