(10 июль, 2017 ел) Мәскәүдә Россия халыклары Ассамблеясе Советының киңәйтелгән утырышы узды. Чарада Татарстанның Халыклар Дуслыгы йорты директоры, ТР Дәүләт Советы депутаты Ирек Шәрипов һәм Татарстан халыклары Яшьләр Ассамблеясе лидеры Тимур Кадыров катнашты.
Утырышта шулай ук Россия халыклары Ассамблеясе Советы әгъзалары, «Мы-Россияне» Россия халыклары Яшьләр Ассамблеясе әгъзалары, федераль һәм региональ хакимият органнары, җирле үзидарә органнары вәкилләре, федераль милли-мәдәни автономия һәм берләшмәләр җитәкчеләре, экспертлык берләшмәсе вәкилләре дә катнашты.
Утырыш ачылышында Россия халыклары Ассамблеясе рәисе Светлана Смирнова VII Россия халыклары Съездына һәм I Евразия халыклары Ассамблеясе Съездына нәтиҗә ясады. Моннан тыш Светлана Смирнова сүзләренчә, Россия Президентына Россия халыклары Ассамблеясенә иҗтимагый-дәүләт статусы бирү буенча мөрәҗәгать тә әзер.
Утырышта Россия халыклары Ассамблеясе Советы рәисе урынбасарлары һәм беренче урынбасарлары вазыйфасына кандидатлар исемлеге укылды. Россия халыклары Ассамблеясе рәисе урынбасары итеп Татарстанның Халыклар Дуслыгы йорты директоры, ТР Дәүләт Советы депутаты Ирек Шәрипов сайланды.
Татарстанның Халыклар Дуслыгы йортының мәгълүмат үзәге