(16 сентябрь 2019) Татарстанның Халыклар дуслыгы йортында Салиевлар гаиләсенең «Габдулла Тукай әкиятләре дөньясында» шәхси күргәзмәсе ачылды.
Күргәзмәдә тәкъдим ителгән барлык эшләр дә Мөслимә ханым Салиева, аның тормыш иптәше Вакыйф әфәнде һәм кызлары Диләрә кулы белән тудырылган. Сәйләннәр белән чигелгән эшләр бөек татар шагыйре Габдулла Тукайның әкият дөньясына багышланганнар. Мөслимә ханым сүзләренчә, иҗат белән мавыгу башта аның хоббие гына булган, ә тора-бара аның шөгырен гаиләнең башка әгъзалары да үз иткән.
Күргәзмәне ачу тантанасында ТАССРның атказанган артисты, Татарстан Республикасының халык артисты Мингол Галиев чыгыш ясады. Ул Г.Тукайның иң танылган шигыре дип «И, туган тел»не атады һәм, бу шигырьдә сүз аерым бер тел турында түгел, ә теләсә кайсы халыкның һәм милләтнең төп үзенчәлеге булган туган тел турында бара, дип белдерде.
Дуслык йортының мәгълүмат үзәге