(8 май 2021) Җиңү көне алдыннан Татарстанның күп милләтле яшьләре Горький исемендәге казан паркында урнашкан Мәңгелек утка һәм Билгесез солдат монументына чәчәкләр салдылар. Тантаналы чарада ТР Дәүләт Советы Рәисе, ТР халыклары Ассамблеясе Советы Рәисе Фәрит Мөхәммәтшин катнашты.
Чәчәкләр салу тантанасында чит ил студентлары, республиканың милли-мәдәни автономияләре җитәкчеләре, яшьләр иҗтимагый оешмалары вәкилләре катнашты. Чара, гадәттәгечә, Татарстан халыклары Яшьләр Ассамблеясе инициативасы белән үткәрелә.
Фәрит Мөхәммәтшин сәламләү сүзендә билгеләп үткәнчә, республиканың барлык шәһәр һәм районнарында, бөтен илдәгечә, Җиңү көне иң югары дәрәҗәдә билгеләп үтелә.
«Бу көнне без Бөек Ватан сугышы фронтларында һәм тылда Җиңүне якынайткан кешеләрнең якты хәтере алдында баш иябез. Әтиләребез, бабаларыбызны – фронтка киткән һәм кайтмаган барлык кешеләрне искә алабыз. Без беркемне дә онытмыйбыз. Без илебез һәм тынычлык сагына баскан ата-бабаларыбызның сугышчан батырлыгын, шулай ук тылда булган кешеләрнең авыр хезмәтен хәтердә һәм йөрәкләрдә сакларга тиешбез. Бу авырлык әти-әниләребез, барыннан да элек, хатын-кызлар һәм балалар җилкәсенә төшә. Алар ярдәмендә без тыныч вакытта яшибез», — дип сөйләде парламент башлыгы.
Фәрит Мөхәммәтшин сүзләренә караганда, Татарстан халыклары Ассамблеясе республикада зур берләштерү һәм иҗади эш алып бара.
«Россия – күпмилләтле дәүләт. Телләр, гореф-гадәтләр аермасына карамастан, сугыш Ватанны һәм дөньяны фашизмнан – бу көрән чумадан саклау өчен, барысын да тышкы дошманга каршы берләштерде. Төрле телләрдә сөйләшсәк тә, Ватанга карата мәхәббәт кичә дә, бүген дә безнең дәүләт үсешенең төп мәсьәләләреннән берсе булуына тагын бер кат инанабыз. Тынычлыктан да кадерлерәк нәрсә юк», – диде ул.
Тантаналы чара Билгесез солдатка куелган һәйкәл янында дөньяның төрле телләрендә сугыш турында шигырьләр уку белән дәвам итте.
Чәчәкләр салу Казанда узучы «Татарстанның мәдәни мозаикасы» VII яшьләр милләтара фестивале кысаларында узды. Чара студентлар һәм яшьләр арасында милләтара мөнәсәбәтләрне ныгыту максатыннан, милли мәдәниятләрнең үзара хезмәттәшлеге һәм Татарстан Республикасында яшәүче халыкларның гореф-гадәтләрен саклау аша үткәрелә. Быел фестивальдә республика халыкларының 120 яшь вәкиле, шулай ук чит ил студентлары катнаша.