(11 апрель 2018) Татарстанның Халыклар Дуслыгы йортында Татарстан халыклары Яшьләр Ассамблеясе Советы утырышы узды. Биредә «Татарстанның мәдәни бизәкләре» V республикакүләм милләтара яшьләр фестивален оештыру мәсьәләсе каралды. (ФОТО)
Фестиваль 4-7 май көннәрендә Мамадышта «Регина» отеле базасында узачак. Быел аның яңалыгы да бар: зур масштабтагы урам концерты оештыру планлаштырыла. Биредә милли мастер-класслар күрсәтеләчәк һәм төрле милли ризыклар тәкъдим ителәчәк, шулай ук Бөек Ватан сугышы геройлары истәлегенә чәчәк салу тантанасы да үтәчәк.
Моннан тыш, оештыручылар төрле телдә сугыш турында шигырь сөйләү буенча конкурс та уздырырга ниятли.
Татарстан халыклары Яшьләр Ассамблеясе Советы утырышы барышында фестиваль программасына кертергә мөмкин булган тәкъдимнәр һәм өстәмәләр дә каралды.
«Татарстанның мәдәни бизәкләре» фестиваленә гаризалар 29 апрельгә кадәр кабул ителә. 18 яшьтән 30 яшькәчә булган Россия Федерациясе гражданнары АИС системасы буенча, ә чит ил вәкилләре һәм 16-17 яшьлек Россия Федерациясе гражданнары махсус форма буенча гариза бирә.
Халыклар Дуслыгы йортының мәгълүмат үзәге