Казанның «Туган авылым» комплексында Татарстанда Милли мәдәниятләр һәм гореф-гадәтләр елы уңаеннан махсус промороликлар сериясен төшерү узды. Әлеге проект Татарстанның Халыклар дуслыгы йорты ярдәме белән «Яңа гасыр» телерадиокомпаниясе тарафыннан тормышка ашырыла.
Проектта Татарстан халыклары Ассамблеясе һәм Халыклар дуслыгы йортының 14 активисты – Идел буе халыклары вәкилләре катнашты: татарлар, руслар, мордвалар, марилар, удмуртлар, чувашлар һәм башкортлар. Милли киемнәр кигән артистлар үз халыкларының гореф-гадәтләре, милли ашлары, милли бизәкләре, аларга хас булган традицион шөгыльләр һәм, әлбәттә, республикада милләтара тынычлык һәм татулыкны саклау мөһимлеге турында сөйләде. Шулай ук һәркем туган телендә халыклар арасындагы дуслык турында мәкаль укыды.
Промороликларны 3 апрельдән ТНВ каналында күрергә мөмкин булачак. Аларны ел дәвамында күрсәтәчәкләр.
Дуслык йортының мәгълүмат үзәге