(26 сентябрь 2019) Чарада Татарстан халыклары Ассамблеясе һәм Халыклар дуслыгы йортын «MiraS» инструменталь ансамбле һәм солист Марсель Вагыйзов тәкъдим итте.
Фестиваль XVII Россия халыклары Конгрессы кысаларында үтте. Чараны Милләт эшләре буенча федераль агентлык һәм Түбән Новгород өлкәсе хөкүмәте катнашында «Россия халыклары Ассамблеясе» Бөтенроссия иҗтимагый оешмасы, «Тормыш хакына халыклар иҗаты» Бөтенроссия иҗтимагый оешмасы (Сенеж форумы) оештырды.
Проектның төп максаты – Россиянең дәүләт милли сәясәтен гамәлгә ашыру буенча көнүзәк сорауларны һәм проблемаларны хәл итү, милләтара мөнәсәбәтләрне ныгытуда һәм Россиянең этномәдәни мирасын саклауда этәргеч бирүче иң әйбәт практикаларны җәелдерү һәм киңәшләрне булдыру.
Форум программасында «Россия халыклары мәдәниятен үстерү һәм милләтара татулыкны ныгытуда рус теленең роле», «Бөтенроссия гражданлык үзенчәлеген, халыклар бердәмлеген һәм Россия милләтен ныгытуны формалаштыручы фактор булурак рус мәдәни доминантасы» темалары һәм заман шартларында дәүләт милли сәясәтен гамәлгә ашыру сораулары буенча пленар утырыш, «түгәрәк өстәл», фикер алышу мәйданчыклары узды.
Татарстан вәкилләреннән тыш фестивальдә Иванов өлкәсе Фурманов шәһәреннән «Веснушки» коллективы, Владимир өлкәсе Суздаль районыннан «Радуница» фольклор җыр ансамбле, Марий Эл Республикасыннан «Нежные переливы» фольклор ансамбле һәм Мордовиядән «Од Варма» студентлар арт-театры чыгыш ясады.
Дуслык йортының мәгълүмат үзәге