Бүген Халыклар Дуслыгы йортында «Талир тәңкә» үзешчән ветераннар халык фольклор ансамбле оешуга 25 ел тулуга багышланган зур юбилей кичәсе узды.
Ансамбль 1999 елда Дәүләтова Клара Баян кызы тарафыннан оештырылып иҗат эшен башлап җибәрә. 2012 елдан ансамбльне Атказанган мәдәният хезмәткәре Гайнмхәмәтов Флер Бикмөхәмәт улы җитәкли башлый. Ансамбль ихлас күңелле үзешчәннәре белән дистәләгән еллар таркалмыйча иҗат итә, халыкка хезмәт итә, камиллеккә омтыла. Моның иң яхшы дәлиле — фольклор ансамбле ветераннарының үзешчәннәр өчен үткәрелә торган республика, бөтенрәсәй бәйгеләрендә һәм фестивальлләрендә уңышлы чыгышлары, күпсанлы җиңүләре.
Хөрмәтле «Талир тәңкә» үзешчән ветераннар халык фольклор ансамбле коллективына киләчәктә дә милли мәдәниятне саклап калу һәм үстерү эшендә иҗади уңышлар, яңадан-яңа казанышлар, рәхмәтле тамашачылар теләп Түбән Кама муниципаль районы меры Рамил Хәмзә улы Муллин исеменнән, Ветераннар Советы председателе Китанов Григорий Леонид улы һәм «Халыклар дуслыгы йорты» директоры Хафизов Васил Фаиз улыннан рәхмәт хатлары тапшырылды. Шулай ук Бөтендонья Татар конгрессы җитәкчесе Ганиев Рөстәм Мәҗит улы исеменнән дә ветераннарыбыз өчен истәлекле бүләкләр бирелде.
