(15 март, 2016 ел) Чиләбе өлкәсендә яшәүче 79 яшьлек Ольга Барышникова «В контакте» социаль челтәрен татар теленең урта диалекты булып саналган нагайбак теленә тәрҗемә итү эшенә алынган.
Күптән түгел социаль челтәр хезмәткәрләре теләге булган һәркемгә сайтның битләрен Россия халыклары телләренә тәрҗемә итәргә тәкъдим иткән. 40 еллык укыту стажы булган Ольга Барышникова моңа кадәр нагайбакча-русча сүзлек әзерләп бастырган, хәзер авылдашлары соравы буенча интернетта да нагайбак телен үстерү эшенә алынган.
Нагайбәкләр — татарларның православие динендәге этнографик төркеме. 2002 елга халык саны — 9,6 мең кеше, күпчелеге Чиләбе өлкәсендә яши. Телләре — татар теленең нагайбәк сөйләше.