Татарстанның Халыклар дуслыгы йортында Р.Ваһапов фонды рәисе Рифат Фәттахов җитәкчелегендә «Яңа татар җыры III» конкурсының сайлап алу туры узды.
«Яңа татар җыры» конкурсы — Ваһапов фондының татар милләтеннең хәзинәсе булган моңлы, сыйфатлы, яңа җырлар булдыру, киләчәк буынның иҗади мирасын баету, татар җырларын камилләштерүгә юнәлдерелгән проекты.
Журналистлар өчен оештырылган пресс-конференция барышында быел конкурска 200 гариза килүе турында әйттеләр. Катнашучылар арасында танылган авторлар да, исемнәре билгеле булмаган яңа йөзләр дә бар. Конкурста яшь буенча һәм географик чикләүләр юк.
Сайлап алу ике номинация буенча узды: «Иң яхшы татар җыры» һәм «Иң яхшы балалар җыры». Катнашучылар җырларны татар телендә башкардылар. Алар белән составына Татарстанның Халык шагыйрьләре һәм артистлары, танылган җырчылар, композиторлар һәм музыканлар кергән жюри эшләде.
Конкурсның гала-концерты 2023 елның 18 мартында «Пирамида» мәдәни-күңел ачу комплексында узачак.
Дуслык йортының мәгълүмат үзәге