(9 октябрь, 2017 ел) 21 октябрь көнне Яр Чаллы шәһәрендә «Без бер агач тармаклары» («Мы ветви древа одного») республикакүләм финн-угыр халыклары иҗаты фестивале узачак. Фестиваль Яр Чаллының орган залы каршындагы мәйданда үтә.
Финн-угыр халыкларының (удмурт, мари һәм мордва) җыр һәм бию мәдәниятыннан тыш фестиваль программасы буенча кунакларның әлеге халыкларның милли ризыклары һәм халык кәсебе белән танышу мөмкинлеге булачак.
Теләгән һәркем борынгы рецепт буенча пилмән бөгү мастер-классын уза алачак. Тамашачылар арасында махсус лотерея да уйнату планлаштырыла.
Фестивальне уздыру буенча оештыру мәсьәләләре ТР финн-угыр җәмгыятенең Татарстан халыклары Ассамблеясе һәм Халыклар Дуслыгы йорты вәкилләре катнашындагы күчмә утырышында каралды.
Татарстан Республикасыннан тыш фестивальдә Удмуртия, Мордовия, Марий Эл һәм башка Идел буе өлкәләреннән кунаклар катнашачак.
Фестиваль Яр Чаллы шәһәре, Автозаводской проспекты, 8 йорт адресы буенча 21 октябрьдә 11:00 сәгатьтә башланачак.
Халыклар Дуслыгы йортының мәгълүмат үзәге