(15 гыйнвар) 26 гыйнварда Яшьләр симфоник оркестры Пермь крае Губернаторы В.Ф.Басаргин чакыруы буенча Пермьгә китә. «Филармония – балаларга» проекты кысаларында яшь музыкантлар әлеге шәһәр филармониясе сәхнәсендә ике бүлектән торган концерт бирәчәк.
Оркестрда Казанның 17 музыка мәктәбендә белем алучы 75 малай һәм кыз катнаша. Татарстан Республикасы Дәүләт симфоник оркестры дирижеры Михаил Мосенков җитәкчелегендә яшь башкаручылар тамашачылар хозурына А.Вивальди, В.Моцарт, К.Сен-Санс, А.Хачатурян һәм Э.Григ әсәрләреннән төзелгән шактый катлаулы программа тәкъдим итә. Ялгыз башкаручылар арасында Муса Җәлил оныгының улы – Михаил Митрофанов-Җәлил дә бар.
Яшьләр оркестры турында танылган музыкантлар, мәшһүр башкаручылар күп кенә җылы сүзләр әйткән, аның иҗатын югары бәяләгән. Узган елда коллектив Прагада узган Моцарт исемендәге һәм «Виват, Казан!» халыкара конкурсларында беренче урын алды.
Татарстан Республикасы Мәдәният министрлыгының Матбугат хезмәте