(9 декабрь, 2015 ел) Гүзәл Яхинаның Сталин заманындагы репрессия турындагы беренче “Зөләйха күзләрен ача” (“Зулейха открывает глаза”) романы укучыларның фавориты булып билгеләнгән.
“Большая книга” премиясенең интернет-тавыш бирү конкурсы буенча әлеге роман иң күп тавышны җыйган. Бу хакта ТАССка конкурсның матбугат үзәге хәбәр иткән.
Интернет-тавыш бирү кич белән туктатылган. Нәтиҗәдә, Яхинаның романы 484 тавыш җыйган. Икенче урында Анна Матвееваның “Девять девяностых” әсәрләре җыентыгы – 343 тавыш, өченче урында Валерий Залотуханың “Свечка” романы – 328 тавыш.
“Зулейха открывает глаза” – Казанда туып үскән татар язучысы Гүзәл Яхинаның беренче романы. Китап Яхинаның гаилә тарихына нигезләнеп язылган, ә төп героиняның прототипы – Гүзәлнең әбисе. Гади авылдан булган татар крестьян кызы Зөләйханы башка күчеп килүчеләр белән Себергә җибәрәләр. Тайгада, Ангараның ярларында йөзләгән күченеп килүчеләр – крестьяннар, зыялылар, җинаятьчеләр, төрле милләт һәм дин вәкилләре – авыр шартларда барысы бергә көн саен яшәү өчен көрәшәләр.
Мәгълүмат ТАСС сайтыннан алынды