(2 октябрь, 2015 ел) Буа шәһәрендә «Татарстан — безнең йортыбыз» дип исемләнгән Республика этно-мәдәни фестиваленең беренче зона туры узды.
«Татарстан — безнең йортыбыз» дип исемләнгән фестиваль берничә ел рәттән үткәрелә. Аның максаты — Татарстан Республикасы территориясендә яшәүче халыкларның бердәмлеген һәм үзара рухи баетылуны ныгыту, Татарстанның күп милләтле мәдәниятын саклау, үстерү һәм популярлаштыру.
Тәтеш, Чүпрәле, Апас, Кайбыч, Буа, Кама Тамагы районнарындагы сайлап алу турларын үткән чыгыш ясаучылар һәм коллективлар Буадагы зона турында үз осталыкларын күрсәттеләр. Катнашучылар 5 номенациядә көч сынаштылар: вокал, хореография, фольклор, нәфис сүз һәм инструменталь башкару. Концерт программасында татар, рус, керәшен, мордва һәм башка мәдәниятлар тәкъдим ителгән иде.
Нәтиҗәләр буенча, жюри җиңүчеләрне фестивальнең Казанда үтәсе Гала-концертына чакырачак. Бу чара Халыклар бердәмлеге көнендә үтәчәк.
Татарстан халыклары Дуслык Йорты мәгълүмат үзәге