Очрашу гадәти булмаган формада уздырыла. “Калеб” иҗат берләшмәсе җырчының дусларын һәм хезмәттәшләрен, аның иҗатын сөючеләрне музыкаль буфетка чакыра. Биредә кунаклар яшь шагыйрьләрнең Илһам Шакировка багышланган яңа шигырьләрен тыңлый алачаклар, шулай ук Г.Тукай исемендәге Татар дәүләт филармониясе солистлары башкаруында халык, классик һәм татар композиторларының җыр-моңнарын ишетергә мөмкин.
Очрашу гадәти булмаган формада уздырыла, иҗат кичәсенең төп сәбәпчесе белән чәй өстәле артында утырып сөйләшү мөмкинлеге туачак. Иҗат вәкилләре буларак Разил Вәлиев, Ркаил Зәйдулла, Газинур Морат, Кадыйм Нуруллин – кичәнең махсус кунаклары, дип хәбәр итә Казан мэриясе сайты оештыручыларга сылтама белән.
Бәйрәм программасында шулай ук Рүзәл Мөхәммәтшин, Йолдыз Миңнуллина, Булат Ибраһимов, Эльвира Һадиева, Рифат Сәлах, Эльнар Байназаров катнашачак.
Искәртеп үтәбез: 13 март көнне Мәскәүнең Кремль Дәүләт сараенда легендар җырчы, Татарстанның һәм Россиянең халык артисты Илһам Шакировның юбилей концертын уздыру планлаштырыла. “Җырларда тормыш һәм илһам…” дип аталган программа җырчының 80 яшьлек юбилеена багышлана. Бу турыда “Татар-информ” агентлыгы 19 гыйнварда ук хәбәр иткән иде.