(22 октябрь 2019) Татарстан башкаласында «Күпмилләтле Казан — Бию» милли мәдәният фестивалендә катнашу өчен гаризалар кабул ителә. Фестивальне Казан башкарма комитеты һәм Татарстан халыклары Ассамблеясе оештыра.
Фестивальдә 16 яше тулган милли-мәдәни иҗтимагый оешмалар, мәдәни милли үзәкләр, үзешчән фольклор-этнографик коллективлар, Казанның мәдәният һәм мәгариф учреждениеләре иҗат берләшмәләре вәкилләре катнаша ала.
Гаризалар видеопрезентация формасында 5 ноябрьгә кадәр кабул ителә. Иң әйбәт дип табылган чыгышлар фестивальнең 5 декабрь көнне Ленин исемендәге мәдәни-ял итү компексында узачак Гала-концертында тәкъдим ителәчәк.
Катнашу шартлары һәм гариза тутыру үрнәген фестивальнең положениесыннан белергә мөмкин.
«Күпмилләтле Казан» уртак бренды астында фестиваль тәүге тапкыр гына үткәрелми. Мисалга, узган елны «Күпмилләтле Казан — Балалар» фестивале оештырылган иде.
Фестивальне Казан башкарма комитетының телләрне үстерү һәм иҗтимагый оешмалар белән үзара бәйләнешләр бүлеге, Мәдәният идарәсе, Мәгариф идарәсе, Татарстан халыклары Ассамблеясе һәм Халыклар дуслыгы йорты, Республика традицион мәдәниятне үстерү үзәге һәм ТР Мәдәният министрлыгы оештырды.
Дуслык йортының мәгълүмат үзәге