(8 февраль 2020) Татарстанның Халыклар дуслыгы йортында 2020 елда Идел буе халыкларының бөтенреспублика бәйрәмнәрен үткәрү мәсьәләләре буенча координацион җыелышлар циклы дәвам итә. Быел әлеге бәйрәмнәр ТАССРның 100 еллыгына багышланалар.
Җыелышларда Республика традицион мәдәниятне үстерү үзәге белгечләре, Татарстан халыклары Ассамблеясе һәм Халыклар дуслыгы йорты, республиканың региональ милли-мәдәни автономияләре вәкилләре, шулай ук бәйрәм чараларын оештыручы муниципаль районнар вәкилләре катнаша.
Мондый очрашулар оештыру дәверендә «Пеледыш Семык» мари мәдәнияте, «Учук » һәм «Уяв» чуаш мәдәнияте, «Иван Купала» славян мәдәнияте бәйрәмнәрен оештыру нечкәлекләре буенча фикер алышынды. Ягъни, терриория үзенчәлекләре, сәхнә мәйданчыкларын урнаштыру, күргәзмә, концерт программасы, мастер-класслар оештыру каралды.
Республика традицион мәдәниятне үстерү үзәге белгечләре аеруча да борынгы халык гореф-гадәтләрен сакларга, алардан тайпылмаска сорады.
Узган ел чараларын анализлау нәтиҗәләрен исәпкә алып, 2020 елга төп җаваплылык зоналары һәм эш юнәлешләре билгеләнде.
Икенче атнага «Питрау» керәшен мәдәнияте, «Балтай» һәм «Валда шинясь» мордва мәдәнияте, «Гырон быдтон» удмурт мәдәнияте һәм «Каравон» рус мәдәнияте бәйрәмнәре буенча фикер алышачаклар.
Дуслык йортының мәгълүмат үзәге