Алексеевскта милли мәктәпләр базасында Туган телләрне саклау мәсьәләләре турында фикер алыштылар

(23 июль 2021) Алексеевск шәһәрендә Татарстан Республикасы Премьер-министры урынбасары Васил Шәйхразыев катнашында районның милли мәктәпләре базасында Туган телләрне саклау мәсьәләләре буенча фикер алыштылар.

Чарада шулай ук Татарстан халыклары Ассамблеясе Советы башкарма комитеты җитәкчесе Константин Яковлев һәм Дуслык йорты директоры урынбасары Глюс Гаянов катнашты. Кунаклар Олы Тигәнәле һәм Чишмә мәктәпләрендә булдылар; анда балалар татар, мордва һәм чуаш телләрендә белем алалар.

Район башлыгы Сергей Демидов билгеләп үткәнчә, җирле милли мәктәпләр — районның горурлыгы.

«Бердәмлекне һәм конфессияара татулыкны тәрбияләүдә милли мәгариф мөһим роль уйный. Мәгарифнең уңышы педагогик кадрлар белән билгеләнә. Шуңа күрә Зур Тигәнәле авылында милли мәгариф үзәген төзү һәм гамәлгә кертү туган телләрне саклау буенча көндәлек эшебездә уртак җиңүебез булды», — дип сөйләде Сергей Демидов.

«Телне «әйе-юк-рәхмәт» дәрәҗәсендә генә өйрәнергә кирәк түгел, баланы ата-аналар телендә уйларга һәм үз фикерен дөрес итеп сөйләргә өйрәтү мөһим. Бүген Олы Тигәнәле мәктәбендә күргәннәребез республиканың башка районнарында да тиражларга тиешле үрнәк: менә дигән база, үз эшләрен яратучы педагоглар, бәхетле балалар. Бу — яхшы үрнәк», — дип ассызыклады Васил Шәйхразиев.

Заря материалы тәрҗемәсе

bn-of-rt bn-uslugi bn-ufms bn-anrussia bn-prch