Туган телдә матур һәм сәнгатьле сөйләү генә түгел, текстның мәгънәсен тоеп, аны тыңлаучыга җиткерә белү дә мөһим. Түбән Камада узган «Мин татарча укыйм» муниципаль бәйгесендә катнашучылар нәкъ менә шушы осталыкларын сынады. Быелгы конкурс шәһәрнең 60 еллыгына багышланды, дип хәбәр итә «Түбән Кама яңалклары».
НТР 24 фотосы
Габдулла Тукай исемендәге үзәк китапханәдә әлеге бәйге алтынчы тапкыр үткәрелде. Катнашучыларга алдан таныш булмаган текстлар тәкъдим ителде. Алар өч турда көч сынашты: башта төбәк авторларының шигырьләрен, аннары юмористик хикәяләрне, соңгы этапта Түбән Кама тарихына багышланган документаль-публицистик мәкаләләрдән өзекләрне укыдылар.
Биремнәрне әзерлексез башкарырга туры килде. Конкурсантларга сүзләрне дөрес әйтү генә түгел, текстның эчтәлеген һәм рухын тавыш, интонация һәм сәнгатьле уку аша җиткерү дә мөһим иде.
«Бәйгедә катнашучыларның әзерлексез укуы һәм текстларга артистлык осталыгы өстәве аеруча сокландырды», — дип билгеләп үтте «Кама таңнары» әдәби берләшмәсе җитәкчесе Рәсимә Нәбиуллина.
20 яшькә кадәрге катнашучылар арасында:
- I урын — Азалия Закирова;
- II урын — Азалия Исмаилова;
- III урын — Фидан Шәкүров.
20 яшьтән өлкәннәр арасында:
- I урын — Альбина Сәмигуллина;
- II урын — Айгөл Шагиева;
- III урын — Рәмзия Мостафина.
Бәйге ахырында барлык катнашучыларга истәлекле бүләкләр һәм сертификатлар тапшырылды.