Габдулла Тукай әдәби музеенда рәссам-каллиграф Нәҗип Нәккашның күргәзмәсе ачылды. Габдулла Тукайның 140 еллыгына һәм «Казан – ислам дөньясының мәдәни башкаласы» елына багышланган бу күргәзмә «Бөек Тукай һәм аның бөек замандашлары» дип атала.
Күргәзмәдә төп урынны Габдулла Тукай әсәрләрен файдаланып иҗат ителгән шәмаилләр сериясе алып тора. Шәмаилләрнең күбесендә шагыйрьнең әсәрләре Коръән аятьләре, Пәйгамбәрнең (салләллаху галәйһи вә сәллам) хәдисләре белән аваздаш булып үзәк урынны алып тора.
Күргәзмә 22 октябрьгә кадәр эшләячәк.
Нәҗип Наккаш – әдәбият белгече, рәссам-хаттат, график, Татарстанның атказанган сәнгать эшлеклесе, Тукай исемендәге дәүләт бүләге лауреаты.
